::
有說設計師總喜歡整日瘋狂聯想（brainstorming）*，昨晚收到「一人一樂器 去七一遊行【我有權奏樂!!!】」這段消息，腦內的聯想機器旋即不停運作，一直自問「七一還可禁什麼？」，好，就讓我來個反建議，希望有關方面考慮：
禁止行直線：原本一至兩個鐘的行程，因為不能走直線，需要更長時間完成，攰死你！
禁止飲水：口乾頸渴無水飲，自然散水啦？
禁止豉油撈飯：化濃妝／面具／頭盔等整色整水者，雖然好多攝錄器材係高清啫，但你點叫有關方面秋後算帳呀？
禁止唱遊：一路唱歌一路遊行？幼稚園必修科？好好好，著手研究禁埋佢！
禁止攜帶下一代：有好多嘢，唔洗吓吓要交代嘅？大人做嘢，細路仔收聲啦！
禁止講道理：大家應該係同一個平台對話呀，你講道理？叫有關方面點明白呢？
禁止於遊行前空肚食早餐：睇你仲有邊個出到嚟？
禁止放飛機：亂拋垃圾，罰$1500蚊，政府派$6000，你可以有四次機會？吓？「放飛機」有另一個意思？哎呀！今次捉蟲......
禁止交談：細聲講大聲笑，係會令人心煩嘅，有咩你咪大聲講囉！
禁止肥佬着笠衫**：係呀！你呀！死肥佬！除衫呀！
禁止任何數字：64、71、2012、5區，差不多一至十都齊，咁多數字，嚴重影響咗有關方面統計人數，所以唔準確係正常嘅！
禁止快閃黨：同上，嚴重影響咗有關方面統計人數，唔該你哋企定定畀有關方面計呀！
禁止憤怒鳥：係囉！咁多遊戲角色，唔好揀呢個啦，乖！
......
小時候，明報每星期日有一版叫「荒謬」，今年好明顯出現了現實版......
禁止攜帶樂器，除了荒謬，我認真聯想不到其他辭語......
歡迎大家繼續提供，提出你的「七一還可禁什麼？」
*參考：50 reasons not to date a graphic designer
**肥佬着笠衫：（廣東歇後語）幾大就幾大，意指不顧一切豁出去。
